Расклад набажэнстваў

Св. Імша

Панядзелак   9.00,  18.00

Аўторак           9.00, 18.00

Серада             9.00, 18.00

Чацвер             9.00, 18.00

Пятніца            9.00, 18.00

Субота              9.00, 18.00

Нядзеля           9.30,  11.30,  17.00,  18.00

Споведзь магчыма штодзённа перад Імшой
(будныя дні - 8.30, 17.30, нядзеля - 9.00, 11.00, 16.30, 17.30)

 

Парафіяльныя аб'явы

28/11/2021

I нядзеля Адвэнту

1. Літургічны каляндар на бягучы тыдзень:

Гэтай нядзеляй распачынаем Адвэнт, час духоўнай падрыхтоўкі да Божага нараджэння. Рараты: аўторак, чацвер, субота а 6.30.

2. На гэтым тыдні прыпадаюць першыя чацвер, пятніца, субота і нядзеля месяца з адмысловымі набажэнствамі.

3. У сакрыстыі можна узяць аплатак на Вігілійны стол.

4. Няхай добры Бог благаслаўляе нас час чакання Пана!

Інтэнцыя для нашай парафіі: каб мы выкарысталі час, дадзены Богам!

 

Расклад катэхезы 2021/22 г.

Група 1 (першы год падрыхтоўкі да сакрамэнтаў Пакаяння і Эўхарыстыі) — 13.00, катэхетычны клас.

Група 2 (другі год падрыхтоўкі) — 12.00 і 14.00, катэхетычны клас.

Група 3 (першы год пасля сакрамэнтаў Пакаяння і Эўхарыстыі) — 15.00, катэхетычны клас.

Група 4 (другі год пасля сакрамэнтаў) — 16.00, катэхетычны клас.


Заняткі праводзіць сястра Серафіна, тэл. (029) 891 65 42.

 

Запрашаем на біблійную сустрэчу!

Серада, 18.30*, канферэнц-зала

Біблійныя спатканні - гэта наша супольнае засяроджанне на натхнёным тэксце. Бог запрагнуў размаўляць са сваім народам менавіта праз тэкст бібліі, які чытаецца ў супольнасці веруючых людзей. Гэтыя спатканні ў 2021/22 катэхетычным годзе прадугледжваюць дакладнае прачытанне і аналіз тэкстаў бібліі, якімі Касцёл паслугоўваецца пры цэлебрацыі святых сакрамэнтаў.
У верасні мы распачалі па чарзе разглядаць усе тэксты чытанняў падчас сакрамэнту хросту. Такім чынам мы нібы наноў з большым усведамленнем і глыбінёй разумення будзем адкрываць вялікі дар святога хросту. Пазней будзе наступны сакрамэнт (гэта канфірмацыя) і адпаведныя тэксты. Так на працягу года мы паспрабуем прааналізаваць і наблізіць разуменне ўсіх тэкстаў бібліі, якія чытаюцца падчас здзяйснення святых сакрамэнтаў Касцёла.

Да біблійнага кола могуць далучацца ўсе жадаючыя!
Сустрэчу праводзіць доктар тэалогіі кс. Валерый Марціноўскі, тэл. (033) 324 50 69.

*Пачатак пасля вячэрняй св. Імшы

 

Хрост у нашым касцёле

Святы хрост - гэта першы і самы неабходны сакрамэнт, праз які Хрыстус вызваляе нас ад першароднага граху і іншых асабістых грахоў, яднае нас з сабою, дае нам Божае жыццё і ўключае ў святы Касцёл.

Перад сакрамэнтам хросту трэба:

  • Паведаміць пробашчу парафіі (кс. Валерый Марціноўскі +37533 324 50 69, valerymartsinouski@tut.by)
  • Прайсці падрыхтоўку
  • Вызначыць дату
  • Прынесці пасведчанне аб нараджэнні дзіцяці
  • Набыць свечку для хросту і асобнае белае адзенне для дзіцяці

Пажадана, каб хросныя бацькі былі каталіцкага веравызнання (адзін з хросных абавязкова павінен быць католікам!).

 

Інфармацыя для нарачоных

Бог стварыў мужчыну і жанчыну па свайму вобразу і падабенству і паклікаў іх перадаваць наступным пакаленням новае жыццё як плён узаемнай любові сужэнцаў і як праяўленне любові Бога Творцы. Ад пачатку гісторыі чалавецтва сужэнства было святым саюзам, а Хрыстус нават узвысіў яго да годнасці сакрамэнту.

У сакрамэнце сужэнства мужчына і жанчына заключаюць саюз для супольнага жыцця, а таксама атрымліваюць Божую ласку для належнага выканання сужэнскіх абавязкаў, а асабліва для добрага выхавання патомства.

Калі вы хочаце атрымаць сакрамэнт сужэнства (шлюб) у нашым касцёле, трэба:

  • Звярнуцца да пробашча кс. Валерыя Марціноўскага (+37533 324 50 69, valerymartsinouski@tut.by або падысці пасля любой Імшы ў сакрыстыю) не пазней як за 3 месяцы да вызначанай даты шлюбу
  • Прайсці перадшлюбную падрыхтоўку
  • Прынесці пасведчанні хросту, канфірмацыі і св. Камуніі

 

Запрасіць святара (029) 785 12 98

Намашчэнне хворых


Сям'я хворага павінна паклапаціцца:

  • неадкладна паклікаць святара (не чакаць да самага канца, таму што гэты сакрамэнт не з'яўляецца сакрамэнтам «апошняга намашчэння», але «сакрамэнт вылячэння» )
  • падаць дакладны адрас
  • калі хворы знаходзіцца далёка, арганізаваць сродак транспарту або суправаджэнне для святара
  • канкрэтна вызначыць стан пацыента (ці хворы ў стане свядомасці, ці размаўляе, ці можа праглынуць - гэта звязана з яго споведдзю і прыняццем Святой Камуніі) 

У першую пятніцу месяца святары наведваюць хворых з нашай парафіі і ўдзяляюць сакрамэнт Намашчэння. Просьба паведаміць, калі ваша сям'я мае такую патрэбу!

Пахаванне


Пры арганізацыі пахавання неабходна найперш наведаць святара (пробашча) сваёй парафіі, каб дамовіцца па ўсіх пытаннях, звязаных з пахаваннем (устанавіць дзень, гадзіну). Пры сабе неабходна мець пасведчанне аб смерці.

Аднак першае, пра што павінен памятаць католік, у якога памірае блізкі ці родны, — гэта малітва, а не роспач. Душа памерлага чакае малітвы, таму трэба даручыць памерлага Божай Міласэрнасці, каб Пан прабачыў усе грахі і адарыў жыццём вечным.

Вельмі важным момантам застаецца трыванне ў малітве пры труне памерлага — аб гэтым таксама варта памятаць пры арганізацыі пахавання.

Святая Імша — найбольшы падарунак, які можна зрабіць памерлым, а праз актыўны ўдзел (прыняцце святой Камуніі) дапамагаем душы памерлага. Ніколі малітвы не будзе зашмат! Бо калі яна не патрэбна ўжо вашаму блізкаму памерламу, заўсёды ёсць тыя душы, за якія ніхто не моліцца.

Вельмі важным з'яўляецца ахвяраванне Імшы ў гадавіну пасля смерці, у дзень нараджэння памерлага ці ў дзень імянінаў.

Асабліва памятаем пра памерлых у лістападзе. Для тых, хто мае такую магчымасць, можна ахвяраваць за памерлага 30 Імшаў (так званая грыгарыянская Імша), каб Бог дараваў яго душы кары ў чыстцы. 

Пастырскае наведванне сем'яў і благаслаўленне дамоў

Пастырскае наведванне - гэта сустрэча святара са сваёй паствай, каб бліжэй пазнаёміцца з парафіянамі, даведацца, як і чым яны жывуць. Так з`яўляецца пэўнае супрацоўніцтва па ўмацаванні веры і стварэнні моцнай парафіяльнай супольнасці.

Спачатку адбываецца абрад асвячэння жылля. Ён складаецца з малітвы святара разам з членамі сям`і і акраплення жылля святой вадой. А потым святар размаўляе з гаспадарамі дома і іншымі членамі сям`і.



 

3 чэрвеня ў катэдральнай парафіі Езуса Міласэрнага адбылася працэсія Божага Цела


 

14 ДЗЯЦЕЙ З ВІЦЕБСКАЙ КАТЭДРЫ ЎПЕРШЫНЮ ПРЫНЯЛІ ЦЕЛА ХРЫСТА

У нядзелю 23 мая ў вiцебскай катэдральнай парафіі Езуса Мiласээрнага адзначалі свята Спаслання Духа Святога. У гэты дзень адбылася ўрачыстасць Першай святой Камуніі, якую з рук пробашча кс. канонiка Валерыя Орсiка прыняло 14 дзетак.


Фота: Анатоль Бандарчук-Вошлаў

 

Пасхальная вігілія — галоўная Імша літургічнага года

Святой Імшой Пасхальнай вігіліі мы распачалі святкаванне найбольшай хрысціянскай урачыстасці. Літургія Пасхальнай вігіліі – гэта самая ўрачыстая Літургія ва ўсім годзе, якая напоўнена багатай сімволікай.

А 21 гадзіне распачалася Літургія Святла, падчас якой быў асвечаны новы агонь і запалена Пасхальная свечка – Пасхал. Гэта свечка з натуральнага воску з’яўляецца літургічным сімвалам Езуса Хрыста, Які ёсць Святлом свету (Ян 8, 12).

Пасля радаснага спеву “Exultet!” (“Радуйцеся!”), які абвясціў аб вызваленні чалавецтва з рабства граху і смерці, распачалася другая частка – Літургія слова. У Пасхальную ноч Літургія слова асабліва багатая, чытанні са Старога і Новага Запавету ўзгадваюць гісторыю збаўлення чалавецтва, пачынаючы ад стварэння свету і да збаўчай смерці і ўваскрасення Езуса.

Падчас Літургіі Хросту адбылося благаслаўленне хрысцільнай вады і аднаўленне абяцанняў Хросту, падчас якіх прысутныя вернікі ўзгадалі свой уласны Хрост, яшчэ раз выракліся зла і вызналі сваю веру ў Бога.

Пасля Эўхарыстычнай Літургіі адбылася Рэзурэкцыйная працэсія.


Фота: Анатоль Бандарчук-Вошлаў

 

Вялікая пятніца

У Вялікую пятніцу нідзе ў свеце не цэлебруецца Эўхарыстыя. У гэты дзень Першасвятар нашага збаўлення Хрыстус, паміраючы на крыжы, прынёс на ім крывавую ахвяру ўміласціўлення Нябеснаму Айцу за грахі ўсіх людзей.

Увечары ў гэты дзень ва ўсіх касцёлах адбываецца набажэнства Адарацыі святога Крыжа. Выйшаўшы да алтара, святары кладуцца перад ім крыжам і пэўны час моляцца ў маўчанні разам з вернікамі, якія кленчаць.

Пасля пакланення Крыжу адбываецца ўдзяленне Камуніі, і святыя Эўхарыстычныя дары пераносяцца ў грабніцу. Грабніца  застаецца адзіным асветленым месцам у касцёле, а ўсё іншае святло гасіцца. Вернікі застаюцца перад ёй у малітве і адарацыі на доўгі час.


Фота: Анатоль Бандарчук-Вошлаў

 

Вялікі чацвер у катэдральнай парафіі Езуса Міласэрнага

Вялікі чацвер – гэта дзень, калі Пан Езус падчас Апошняй Вячэры ўстанавіў два сакраманта: Святарства і Эўхарыстыі.

У гэты дзень у кожным касцёле адбываецца ўрачыстая святая Імша Вячэры Панскай.  На заканчэнне св. Імшы па традыцыі, Цела Езуса ў Найсвяцейшым Сакраманце было перанесена з галоўнага алтара ў Цямніцу, дзе  знаходзілася аж да Вялікай пятніцы, каб кожны парафіянін меў магчымасць адараваць Езуса хоць некаторы час.

Адразу пасля малітвы, пробашч парафіі кс. кан. Валерый Орсік запрасіў у парафіяльную кавярню на вячэру мужчын і падараваў кожнаму абраз "Апошняй вячэры". Спадзяемся, што гэта стане добрай традыцыяй, каб і надалей збірацца разам за супольным сталом у дзень Святарства.


Фота: Анатоль Бандарчук-Вошлаў

 

Святая Iмша-Пастэрка ў Вiгiлiю Божага Нараджэння з катэдральнага касцёла Езуса Міласэрнага ў Віцебску.


Фота: Анатоль Бандарчук-Вошлаў

 

СВЯТЫЯ МІСІІ - ГЭТА РЭНТГЕН    НАШАЙ ВЕРЫ…

З 18 па 25 кастрычніка ўпершыню ў гісторыі г. Віцебска адбыліся Святыя Місіі! 

Фота: Анатоль Бандарчук-Вошлаў

 

Віцебская катэдральная парафія Езуса Міласэрнага адзначыла сваё 20-годдзе


Анатоль Бандарчук-Вошлаў, фота


 

Гісторыя парафіі

22 кастрычніка 2000 г. была адпраўлена першая св. Імша для вернікаў парафіі Езуса Міласэрнага ў касцёле св. Барбары (катэдральным на той момант). Прысутнічала 56 чалавек.

16 лістапада 2000 г. парафія Езуса Міласэрнага атрымала дазвол на пабудову часовай капліцы.

Вельмі добра пра гэты час у жыцці парафіі распавядае Францішак Дубраўскі (часопіс “Ave Maria”, №4/2002):

“Пасля асвячэння месца пабудовы распачалася праца. Гэта быў нялёгкі час, але і парафіяне, і кс. Адам Сікорскі, і дыякан Аляксандр Рагіня, і сёстры Нікола, Дамарыс і Люцына з гонарам пераадолелі цяжкасці, звязаныя з будаўніцтвам. І ўжо 3 снежня, у першую нядзелю Адвэнту, адбылася Імша ў новай капліцы — за сталом замест алтара, на настылым, адно сагрэтым усхваляваным дыханнем парафіянаў, паветры. Гэты дзень першай супольнай малітвы і размовы з Богам добра запомніўся дарослым і дзецям, стаў найважнейшым момантам парафіяльнага жыцця”.

 

Капліца

25 снежня 2000 г. капліцу асвяціў біскуп Уладзіслаў Блін.

3 сакавіка 2001 г. першым пробашчам парафіі стаў кс. Дарыюш Кубіца, SDS.

30 чэрвеня 2001 г. у парафіі адбылася першая біскупская візітацыя.

18 лістапада 2001 г. парафіяне развіталіся з а. Дарыюшам і прывіталі новага пробашча — а. Тадэвуша Дабравольскага, які да гэтага працаваў у Іркуцку і Браславе (ён таксама належаў да кангрэгацыі сальватарыянаў).

 

Кансэкрацыя касцёла, перанясенне катэдры

12 верасня 2004 г. кс. біскуп ардынарый асвяціў пляцоўку, а ў сярэдзіне кастрычніка 2004 г. гарадскія ўлады далі канчатковы дазвол на будаўніцтва новай святыні.

Кансэкрацыя касцёла Езуса Міласэрнага адбылася 10 кастрычніка 2009 г. у межах святкавання 10-годдзя існавання Віцебскай дыяцэзіі. Літургію, падчас якой адбывалася асвячэнне, узначальваў Апостальскі нунцый у Беларусі арцыбіскуп Марцін Відавіч.

18 чэрвеня 2011 г. катэдра з касцёла св. Барбары была перанесена ў наш касцёл. Урачыстую літургію ў новай катэдры ўзначаліў прадстаўнік Папы Бенедыкта XVI кардынал Робэр Сара, старшыня Папскай рады “Cor Unum”.

 

Абрад кансэкрацыі біскупа Алега Буткевіча

Важнай датай для нашага касцёла з’яўляецца дзень 18 студзеня 2014 г. — калі катэдра атрымала свайго біскупа. 29 лістапада 2013 г. Папа Рымскі Францыск прызначыў кс. Алега Буткевіча новым біскупам Віцебскім. Абрад кансэкрацыі 18 студзеня правёў Апостальскі нунцый Клаўдыё Гуджэроці, асістэнтамі выступілі арцыбіскуп Мінска-Магілёўскай дыяцэзіі Тадэвуш Кандрусевіч і біскуп Гродзенскай дыяцэзіі Аляксандр Кашкевіч. На ўрачыстасці было шмат вернікаў і святароў з іншых дыяцэзій, прысутнічалі прадстаўнікі свецкіх уладаў, праваслаўнай царквы, журналісты.

 

Кс. доктар Валерый Марціноўскі

Ксёндз Валерый Марціноўскі нарадзіўся 11 чэрвеня 1988 г. ў Мёрах. У 2011 г. паспяхова скончыў Міждыяцэзіяльную вышэйшую духоўную семінарыю імя Св. Тамаша Аквінскага ў Пінску.

18 жніўня 2012 г. арцыбіскупам Клаўдыё Гуджэроці пасвечаны ў прэзбітэры. Быў вікарыем катэдральнай парафіі Езуса Міласэрнага ў Віцебску і адміністратарам парафіі Адведзінаў Найсвяцейшай Панны Марыі ў Гарадку. З 2014 па 2019 гады навучаўся ў Люблінскім каталіцкім універсітэце Яна Паўла ІІ у дактарантуры (аспірантуры) Інстытута біблійных навук.

20 верасня 2019 г. абараніў доктарскую дысертацыю па біблійнай тэалогіі. Тэма навуковай працы - «Хрысціяне перад абліччам Дня Пана. Нарыс эсхаталагічнага парэнэзісу ў Пасланнях да Тэсаланікійцаў (1 Тэс 4, 13–18; 5, 1–11; 2 Тэс 2, 1–17)».

У чэрвені 2021 г. прызначаны пробашчам катэдральнай парафіі Езуса Міласэрнага ў Віцебску.

Чытаць болей Святарскае пасвячэнне
Доктарская дысертацыя

 

Чытаць яшчэ

1. Каталіцкі Веснік. Газета Віцебскай дыяцэзіі - catholicnews.by

2. Афіцыйны інтэрнэт-партал Каталіцкага Касцёла ў Беларусі - catholic.by

3. Сайт Віцебскай дыяцэзіі - catholicvitebsk.by

4. Слова жыцця. Газета Гродзенскай дыяцэзіі - slowo.grodnensis.by

5. Часопіс "Ave Maria" Мінска-Магілёўскай архідыяцэзіі - ave-maria.by

6. Інфармацыйны мульціфарматны праект - рускатолик.рф

Мы УКантакце - vk.com/vitkatedra